જ્યારે યુવતીએ પોતાના પતિના પ્રેમપત્રો સાસુને દેખાડયા તો લાજવાની જગ્યાએ સાસુ ગાજ્યા… પુરૂષોને તો આવા શોખ હોય : પતિના પરસ્ત્રી સાથેના સંબંધોનો વિરોધ કરતા સાસરિયાએ પહેરેલ કપડે ઘરમાંથી કાઢી મુકી : દહેજ ઓછું લાવી હોવાનું કહીને સતત ત્રાસ આપતા હતા : પિયર આવી ગયેલી યુવતીને સાસરિયાઓએ છૂટાછેડા આપવા ધમકી આપી હતી
અમદાવાદ તા. ૨૬ : છેલ્લા કેટલાક સમયથી લગ્ન બાદ પતિ પત્ની વચ્ચે અણબનાવ, ઘરમાંથી જ કોઈ અન્ય પુરુષ સભ્ય દ્વારા પરિણીતાની છેડતી અને પતિના અફેર જેવી ઘટાનાઓની ફરિયાદ સતત વધી રહી છે. સમાજમાં આવી રહેલા આધુનિકતાના ચોલા હેઠળ આ બુરાઈઓ પગ પેશારો કરી રહી છે. આવો જ એક કિસ્સો અમદવાદના સૈજપુર વિસ્તારમાં રહેતી મહિલા સાથે બન્યો છે. જેમાં લગ્નની પ્રથમ રાત્રિએ જેનો રોમાંચ અને સપનું દરેક સ્ત્રી પુરુષ માટે ખૂબ જ મહત્વનું હોય છે.
આવી મધુરજનીની રાતે જ પતિએ કહ્યુ હતુ કે, મારે અન્ય મહિલા સાથે પ્રેમસબંધ છે તેની સાથે લગ્ન કરવાના હતા પરંતુ મારે ઘરના સભ્યોના દબાણથી લગ્ન કરવા પડયા છે. વાત હદથી વધી ત્યારે તેણે સાસરીયાને જાણ કરતા તેમણે પણ પતિનો પક્ષ લઈ મહિલાને ઓછુ દહેજ લાવી હોવાના મહેણાટોણાં મારી પરેશાન કરી હતી. દરમિયાન મહિલાને ઘરમાંથી પહેરેલ કપડે કાઢી મુકતા અંતે મહિલાએ પતિ અને સાસરીયા મળી કુલ છ વ્યકિતઓ સામે કૃષ્ણનગર પોલીસ સ્ટેશનમાં ફરિયાદ નોધાવી છે.
ફરિયાદ મુજબ સૈજપુરમાં રહેતી ૨૮ વર્ષીય યુવતીના લગ્ન દહેગામ નજીક આવેલા એક ગામમાં રહેતા યુવક સાથે થયા હતા. લગ્નની પ્રથમ રાતે જયારે પતિ રૂમમાં આવ્યો ત્યારે યુવતીને તેના પતિએ કહ્યુ હતુ કે તેને અન્ય મહિલા સાથે પ્રેમસબંધ છે તેની સાથે જ લગ્ન કરવા હતા પરંતુ મારા ઘરના સભ્યોના દબાણથી તારી સાથે લગ્ન કર્યા છે.
જો કે મહિલાનો પતિ તેની સાથે જરૂરિયાત પૂરતો જ સબંધ રાખતો હતો. તેવામાં લગ્નના એક વર્ષ પછી યુવતી તિજોરી સાફ કરી રહી હતી ત્યારે તેને પતિના અન્ય સ્ત્રી સાથે પ્રેમસંબધ હોવાના ફોટા તથા પ્રેમપત્રો મળ્યા હતા આ સમયે તેણે તેના સાસુસસરા જેઠ વગેરેને વાત કરી પતિને સમજાવવાનુ કહેતા તેની સાસુએ ફોટા ફાડી નાંખવાનુ કહ્યુ હતુ અને કહ્યુ હતુ કે પુરુષોને આવા શોખ હોય આમ કહીને પોતાના દીકરાનો પક્ષ લીધો હતો. પતિના અન્ય મહિલા સાથેના સંબધો અંગે સાસરિયાએ યુવતીને સાથ ન આપીને તેના પતિનો જ પક્ષ લીધો હતો. દરમિયાન યુવતીની વિરુદ્ઘ તેના પતિને ઉશ્કેરતા હતા અને દહેજ ઓછું લાવી છે તેમ કહીને માનસિક તેમજ શારીરિક ત્રાસ આપતા હતા.
યુવતીએ આરોપ મુકયો કે તેનો પતિ અન્ય મહિલા સાથે ફોન પર મોડીરાત સુધી વાતો કરતો હતો જે બાબત સાસરીયાને જાણ કરતા તેઓ યુવતી પર ઉશ્કેરાયા હતા અને તેના પતિને કાનભંભેરણી કરતા તેને મારઝુડ કરાવતા હતા. પિયરમાં ઓશિયાળુ જીવન જીવતી યુવતી સાસરીએ જવા માટે તૈયાર હતી.ત્યારે ગત માર્ચ મહિનામાં તેના સાસરીયા તેના પિયરમાં આવ્યા હતા અને તેને છુટાછેડા આપવા માટે દબાણ કર્યુ હતુ. અને ધમકી આપી હતી તે છૂટાછેડા નહીં આપે તો તને જાનથી મારી નાખીશું.
